Pakabuklan nga P80,621 ti nalimlimo manipod iti maysa a babai kalpasan a nakagatang iti peke a bracelet iti online idiay Barangay San Pablo, San Esteban, Ilocos Sur.
Ti biktima ket agtawen iti duapulo ket siam, naasawaan, negosyante nga agnaed idiay Barangay San Pablo, San Esteban.
Ti met suspek ket babai met laeng nga addan iti husto a tawen nga agnaed idiay Purok 1, Barangay Maquiapo, Guagua, Pampanga.
Nagturong ti biktima iti San Esteban Municipal Police Station ket impakaammona a naaddaan ti online transaksyon iti suspek a nagpayam-ammo a seller isu a gimmatang ti biktima ti uppat a gold bracelet nga aggatad iti P80,621.
Napasamak ti transaksyon iti online platform ket impatulod ti biktima iti bayadna iti seller wenno suspek babaen iti bank account-na.
Kinuna ti biktima, pinakaammoan isuna ti suspek a dagiti nasao nga item ket naipatuloden ken naawat dayta ti biktima idi August 4 ngem ti dua pay nga item, maysa a gold bracelet ket maipatulodto pay laeng kalpasan iti pangaldaw iti nasao met laeng nga aldaw ngem saanen a natuloy ta inreklamo ti biktima iti suspek a ti naawatna nga item ket peke.
Impadasna a kontaken ti suspek ta kiniddawna a maisubli iti kuartana ngem napaay ti suspek a nag-refund ken nagisubli iti kuarta ti biktima.
Binilin dagiti otoridad ti biktima nga idulin pay laeng dagiti ebidensia a maipanggep iti transaksyon pakairamanan ti screenshots iti nagpatanganda, proof of payments, waybill ken packaging ken ti peke a bracelet a naawatna para iti imbestigasyon ken pannakaipila iti mayannatup a kaso.
