Isingsingasing ni Senador Erwin Tulfo ti panangipaay ti ayuda manipud gobierno saan laeng kadagiti marigrigat a sektor ti kagimungan no di ket iti amin a minimum wage earner iti pagilian iti baet ti kumarkaro a global oil crisis.
Iti panagdengngeg iti gakat nga amendments iti Pantawid Pamilyang Pilipino Program Act, livelihood programs, ken ti agpampannuray a pondo kas sungbat iti krisis gapu iti Middle East conflict, kayat nga iraman ni Tulfo dagiti minimum wage earner iti pannakaipaay ti ayuda.
Segun ken ni Tulfo, mabalin nga agtultuloy ti ayuda, ngem ballaagna a saan a nasken a nakatutok laeng kadagiti sumagmamano a sektor kas ti transport, agrikultura, ken 4Ps beneficiaries, idinto a malipatan dagiti kahera, janitor, ken security guard.
Innayonna a nasken a masigurado nga agtultuloy ti suporta ken makabukel iti oportunidad iti pamilia a Pilipino a magun-od ti stability.
