Inyanunsio ni Presidente Ferdinand Marcos Jr. ti nasim-simple ken nadardaras a proseso para iti subsidy ti kuryente ken panangipatungpal ti solar net-metering para kadagiti pamilia a Pilipino kangrunaan kadagiti adda iti marginalized sector.
Iti naisayangkat a “Collective Response to Presidential Commitments In the Energy Sector” iti Meralco Theater, pinasingkedan ni presidente Marcos ti gagem ti administrasion nga aramiden a mapangnamnamaan ti serbisio ti kuryente babaen iti panagikkat kadagiti kualipikado a burukrasya.
Impaganetget ni Marcos ti panangipatungpal ti automatic registration ti amin a benepisyaryo ti Pantawid Pamilyang Pilipino Program (4Ps) iti salinong ti Lifeline Rate Subsidy Program (LRSP).
Segun ti presidente, umabot iti 334, 000 laeng wenno sangapulo ket maysa a porsiento iti kabuklan a 3 milyon a benepisyaryo ti 4Ps ti nagunggonaan iti discount gapu iti dati a narikut a rekisitos.
Innayon pay ni Marcos a saan a nasken a dagiti Pilipino ti agkamkamat iti tulong ngem nasken a ti tulong ti mismo nga umasideg kadagiti Pilipino.
