Isagsaganan ti Department of Human Settlements and Urban Development ti assistance package para kadagiti biktima iti tropical storm Crising a naawanan iti pagtaengan gapu iti bagyo.
Segun ken ni DHSUD Usec for Disaster Response Henry Yap, 276 a pagtaengan ti nadadael gapu iti bagyo Crising ta 34 totally damaged ken 242 a partially damaged.
Innayon ni Yap a binilinnan dagiti amin a Regional Offices kadagiti typhoon-affected areas a makitinnulong iti lokal a gobierno ken dadduma pay nga ahensia para iti panangipaay kadakuada iti post-disaster assistance.
Karaman kadagiti tulong ti pannakaipatungpal ti Integrated Disaster Shelter Assistance Program a mangmangted iti unconditional cash assistance a P30,000 kadagiti pamilia a nadadael ti pagtaenganna, idinto a P10,000 met kadagiti pagtaengan a partially damaged gapu iti natural wenno human-induced disaster.
