‘Premature’ para ken ni Senador Kiko Pangilinan ti pannaka-archive ti impeachment case ni Vice President Sara Duterte ta balawenna no apay a masapul nga i-archive ti maysa a banag a saan pay a final ken executory ta adda pay laeng motion for reconsideration nga impila ti House of Representatives.
Iti pannaki-uman ti Bombo Radyo Vigan ken ni Pangilinan, saan a pudno dagiti nagibasaran ti Korte Suprema iti nagbalin a desisyonda gapu ti ibagbagada a saan a napagbobotosan ti senado ken kamara ti 4th impeachment complaint isu a nasken a maikonsidera ti mosyon.
Impaganetget ti senador a ti impeachment ket maibilang a public accountability wenno patangan iti adda sungsungbatanna iti linteg, nagbiddut, ken nagaramid iti saan a nainkalintegan iti kamara ken senado isu a napateg la unay ti check and balances ken ti separation of powers.
Ngem kunana a ti inaramid ti Korte Suprema ket waswasen ti bileg ti kongreso a mangtignay kadagiti complaints, ken ti bilegda a mangirugi iti trial ken agdesisyon.
Inlawlawag pay ti senador nga awan iti kangatoan a korte ti turay a mangamyendar iti paglintegan, nangruna ta nagibasarda pay kadagiti saan a pudno nga impormasyon kadagiti nagbalin a findings-da.
