Sipapakumbaba ti apo ni dati a Senador Benigno “Ninoy” Aquino Jr. iti agtultuloy a pannakikaysa dagiti Pilipino iti pananglagip iti anibersaryo ti pannakatayna.
Iti pannaki-uman ti Bombo Radyo Vigan ken ni Francis Aquino Dee, Executive Director ti Ninoy and Cory Aquino Foundation, kanayon a lagipen ti pamiliada ti mensahe a “The Filipino is worth dying for”, a kunana a saan laeng a palagip iti kinatured ti lolo-na iti baet ti pangta ti biagna idi nagsubli ditoy Pilipinas.
Kunana, nagserbi daytoy a paglagip iti rason no apay a nagsakripisio ni Ninoy – a gapu iti panagayatna kadagiti Pilipino.
Inallukoy ni Dee dagiti agtutubo nga adalen ti biag ken dagiti inlaban ti lolo-na, nangruna ta agtaltalinaed a relevant dagiti sumagmamano nga isyu nga inlabanna idi.
Karaman ditoy ti korapsion ken human rights, a patangan nga agtultuloy a sangsangwen ita ti pagilian.
Innayonna a napateg a maawatan dagiti baro a henerasion ti pakasaritaan tapno maawatanda dagiti rason iti likudan dagiti sakripisio nga inaramid ni Ninoy para iti pagilian.
