Inaprubaranen ti House Committee on Suffrage and Electoral Reforms ti substitute bill maipanggep ti gakat nga Anti-Political Dynasty.
Nakaala iti duapulo a botos manipod kadagiti miembro ti komite idinto nga uppay iti kimmontra.
Segun ken ni Committee Chairman Zia Alonto Adiong, napagtitipon ti subsitude bill iti duapulo ket lima a bersyon ti gakat a ti dominado ket ti House Bill 6711 da Faustino Dy III ken Sandro Marcos.
Inlawlawag ni Adiong a ti House Bill 6711 ket agserbi a working draft ta isu ti nakaala ti kaaddoan a suportar.
Nasurok sangagasut a kongresista iti nangibingay ti intensyonna nga agbalin a co-author iti gakat.
Iti salinong ti working draft, saan a mapalubosan iti panagpaidasig dagiti agkakabagyan iti kapada a political unit agingga second degree of consanguinity wenno affinity.
Innayonna pay a ti panangbukel ti substitute bill ket maipangruna dagiti rimmuar iti uppat a panagdenggeg iti komite ken tallo a public consultation a naisayangkat iti Carmona para iti Luzon, Cebu City para iti Visayas ken Cagayan de Oro para idiay Mindanao.
