Maipasango iti kaso nga Attempted Parricide ken Grave Threat ti maysa a babai a nanggandat a nangbagkong ken nangpangta iti inana idiay Barangay Pug-os, Sinait, Ilocos Sur.
Ti suspek ket agtawen iti tallopulo ket siam idinto a ti biktima ket ti inana nga agtawen iti walopulo ket dua, agpada nga agnaed iti nasao a lugar.
Nagturong ti biktima iti Sinait Police Station tapno ireport nga idi February 12, 2025, iti alas singko iti malem ket napan ti suspek iti pagtaenganna nga agpukpukkaw ken dumawdawat iti kuarta, ngem saan nga inikkan ti biktima.
Gapu dayta, nangasot ti suspek iti patadem manipud iti bakrangna ta gandatna a bagkongen ti inana, ken pinangtaanna pay a patayen ken puoranna, ngem nakataray ti biktima nga agpaarayat.
Innayon pay ti biktima a ti suspek ket masansan a pangpangtaanna iti biagna, dandanugen, ken no dadduma ket ipupokna iti pagtaenganna no saanna a maikkan iti kuarta.
