VIGAN CITY – “Nu kwarta iti pagpapatangan, nasaysayaat nu ni Amir Khan iti kasango ni Sen. Manny Pacquiao”, dayta iti kapanunutan ni Narvacan Mayor Luis “Chavit” Singson nu siasino iti kapintasan a sumaruno a kasango ni Pacquiao.
Segun ken ni Singson, sikat ni Khan idiay Europe ken Arab countries iti laksid nga awan iti boxing title nga iggem na isu a nu saan pay a matuloy iti laban ti fighting senator ken ni American boxer Floyd Mayweather Jr., napinpintas nu ni Khan pay laeng iti kasango na ta nataltalged ken ad-adu iti mapastrek na a kwarta.
Nu pay kasta, saan pay laeng a sigurado nu idiay Dubai wennu Saudi Arabia a maisayangkat iti sumaruno a laban ti fighting senator agsipud ta saan pay laeng a nalpas iti negosasyon inaig iti nasao a banag ken awan pay iti kasiguradoan na nu ti nasao a British boxer iti sumaruno a makalaban na.
Maipalagip nga idi 2017, saan a natuloy iti laban dagiti dua a boksingero idiay Middle East gapu iti mapapati a parikot iti pondo ket itay laeng kallabes nga inpakaammo ni Khan a nalpasen iti plano para iti laban da kenni Pacman inton Nobyembre ngem pinaglibakan met ti kampo ti fighting senator.
