Saan laeng nga Spain iti manamnama nga agbalin a nainget iti border-na ta arigna amin a pagilian idiay Europe ket paingetenda iti pagannurotan kalpasan a rinibo nga immigrant iti illegal a simrek iti Espanya.
Iti pannaki-uman ti Bombo Radyo Vigan ken ni Bombo International News Correspondent Eva Tinaza, gapu iti panagado dagiti immigrants idi kallabes ket ingetandan iti pagannurotan ken panagbantayda kadagiti border tapno saan a basta makastrek dagiti saan a dokumentado a naggapu iti sabali a pagilian.
Segun ken ni Tinaza, nakigtot iti Spain iti kellaat nga yaadu dagiti immigrante ta saanda nga ammo iti pudno a rason no apay a kayatda iti mapan iti nasao a pagilian.
Kinuna ni Tinaza a delikado iti ar-aramiden dagiti immigrants iti agduduma a pagilian ta mabalin nga isu iti pakaisagmakanda gapu iti napeggad a panagluganda kadagiti barko ken bangka.
Pinasingkedanna a saan amin nga agbibiahe ket makalasat iti biahe ta adda dagiti matay uray no manarimaan pay laeng iti panagdalyasatda iti kabaybayan gapu ta mabannogda a nakasab-it kadagiti barko ken bangka a gappuanan ti pannaka-ibbatda kadagiti naggiggamanda a paset.
No pay kasta ket ar-aramidenen amin nga addang ti Spain tapno saanen a maulit iti nasao a pasamak ta siguradoenda a monitorenda a nalaing dagiti posible a lugar a papanan dagiti immigrante.
