VIGAN CITY– Kinumpirma ti chief-of-police ti Davao City Police Station iti ama ti Maute Brothers a ni Cayamora Maute a nakemmeg iti checkpoint idiay Brgy. Sirawan Toril, Davao City ket agserserbi nga adviser ti grupo.
Segun kenni Sr. Supt. Alexander Tagum, hepe ti Davao City-PNP, ni Cayamora iti mangit-ited ti pammabaga iti grupo a sursuruten met dagit miembro nga isu iti maysa kadagiti nakatulong no apay a dimmakkel ti Maute Group.
Kabayatanna, namnamaen ni Tagum nga agserbi a ballaag kadagiti Maute group iti pannakamemmeg iti ama da ken dagiti tallo pay a kakadwa da tapno saan da a sumrek iti Davao City.
Maipalagip a naranaan dagiti otoridad dagiti uppat a miembro ti maute ket naala kadakuada iti P363,000 a gatad ti kuarta , armas ken granada.
