Pimmusayen ti ama ni dati a Negros Oriental Representative Arnoldo Arnie Teves Jr. a ni Arnolfo Teves Sr. idi bisperas iti paskua iti tawenna a pitopulo ket pito.
Segun ti legal counsel ni Teves Jr. a ni Atty. Ferdinand Topacio, maladingitan ti dati a congressman ken pamiliana iti ipupusay ti amana iti bisperas iti paskua a rumbeng koma a panagraragsak.
Nupay kasta ket saanen a naipakaammo pay ti nakatayan ni Teves Sr.
Maladingitan ni Teves Jr. ta iti baet iti pannakatay ti amana ket saan a makaawid iti pagilian tapno koma makitana iti maudi a gundaway gapu kadagiti sangsangwenna a karit iti biang ti politika ken uray personal interest.
Iti agdama ket adda idiay Timor Leste ni Teves ta maitudtudo a mastermind iti pannakatay daydi Negros Oriental Governor Roel Degamo idiay Pamplona, Negros Oriental idi March 4, 2023.
