VIGAN CITY – Dagiti aktibo a miyembro ti Pantawid Pamilyang Pilipino Program ti Region 1 ket maka-ala ti emergency subsidy iti salinong ti Social Amelioration Program ti gobyerno a kas pinasingkedan ti Department of Social Welfare and Development- Regional Field Office 1.
PHP 5, 500 iti maawat dagiti benepisyaryo ta itatta a bulan ket makaawat da ti PHP 4, 150 pesos a nanayonan ti health grant a PHP 750 ken rice subsidy a PHP 600 pesos.
Kabayatanna, inpalagip ti ahensya iti panagaramat iti face mask wennu panyo ken panagitugot ti alcohol nu rumuwar iti pagtaengan nangruna nu mapan agiwithdraw ti cash assistance kasta payen iti panagdigos ken panagsukat iti lupot nu aggapu iti ruwar iti pagtaengan.
Ti sabali a bangir, idiay Barangay Nagsangalan, Vigan City, naibunongen kadagiti benepisyaryo ti Social Amelioration Form iti panangidaulo ni Barangay Captain Jun Anicas.
Biningay-bingayna ni Anicas dagiti opisyal iti barangay tapno maiwaras iti form nga isu iti suratan dagiti kalugaranna ket maipan to iti opisina ti DSWD- Vigan City sa maipan idiay regional office ti DSWD.
