Awan ti nadangran iti napasamak nga aksidente idiay national highway sakupen ti Barangay Villa Quirino, ili ti San Esteban.
Ti nagmaneho ti Isuzu truck ket agtawen ti tallopulo ket tallo, residente ti Barangay Sabangan, Sinait.
Ti met nagmaneho ti Toyota Vios ket agtawen iti duapulo ket siam, kalugan na ti agtawen ti duapulo ket innem, agpada a residente ti Barangay Villa Veniegas, Llanera, Nueva Ecija.
Basar iti imbestigasion, ti truck ket naka-parking iti amianan a paset ti shoulder lane a nakasango iti abagatan nga agibab-baba ti produkto, idinto a ti Toyota Vios ket agturong iti amianan a direksion.
Idi madanon ti nakapasamakan ti insidente, mapapati a naiturog ti drayber ti kotse isu a naidungpar iti naka-parking a truck.
Awan ti nadangran iti aksidente ngem agpada a nadadael dagiti dua a lugan.
