VIGAN CITY – Tallo iti nadunor ta nasagid ti maysa a bus dagiti dua a motorsiklo idiay Barangay Guimod, Bantay, Ilocos Sur.
Dagiti karaman iti aksidente ket ti nagmaneho iti Honda Click 125 a color orange a ni Jamaica Alquiza Aquino, agtawen iti duapulo, service crew, awanan ti driver’s license nga agnaed idiay Salindeg, Vigan City ken backride na a ni Jemerson Umbay Pilot, agtawen iti duapulo ket tallo, service crew nga agnaed idiay Barangy 2, Amianance, Vigan City; ti nagmaneho ti Yamaha Mio MX125 a color violet ket ni Jenry Paul Favo, agtawen iti duapulo ket tallo, baro, service crew, awanan ti driver’s license nga agnaed idiay Barangay 2, Amianance, Vigan City; idinto a ti nagmaneho ti Maria De Leon Bus ket ni Lloyd Buyat Cayabyab, agtawen iti tallopulo ket lima, holder iti professional driver’s license nga agnaed idiay Maglaoi Norte, Currimao, Ilocos Norte.
Iti pannaki-uman ti Bombo Radyo Vigan ken ni PLt. Reynaldo Reynon a Deputy Chief of Police iti Bantay Municipal Police Station, agpapada nga agpaamianan a direksyon dagiti tallo a lugan ket adda iti outer lane dagiti dua a motorsiklo idin nag-flasher da tapno agsikko a mapan idiay Barangay Sagpat, Bantay ngem bayat ti panagsikkoda ket nasagid isuda ti bus a nag-over take kadakuada.
Gapu ti pannakasagidda ket naawanan ti kontrol dagiti naglugan kadagiti dua a motorsiklo isu a nagsagabada ti dunor iti nadumaduma a paset ti bagida isu nga impan ida dagiti nagresponde a kameng ti Municipal Disaster Risk Reduction and Management Council iti Ilocos Sur Provincial Hospital, Gabriela Silang para ti pannakatamingda idinto a saan a naan-ano ti driver ti bus ngem naipan met laeng iti ospital.
Segun ken ni Reynon, awan ti naka-inom iti arak kadagiti nairaman idi napasamak iti aksidente.
Nupay kasta, nadadael ti headlight ken fairing ti Honda Click 125, naguradan met ti fairings iti Yamaha Mio ken naguradan met laeng iti akin-annigid iti front bumper iti bus.
VIDEO – PLT REYNALDO REYNON
