Dua ti nadunor iti napasamak nga aksidente iti national highway ti Barangay Ballaigui, Sinait, Ilocos Sur a nakairamanan ti kurong-kurong ken kotse.
Nabigbig ti drayber ti kurong-kurong a ni Almario Simbe Sagap, agtawen iti limapulo ket uppat, taga-Barangay Zapat, Sinait, inluganna ni Reynold Arricena Inocelda, agtawen iti limapulo ket siam, taga-Barangay Katipunan, iti nasao met laeng nga ili.
Ti met Toyota Altis a kotse ket minaneho ni Fidel Ignacio Espiritu Jr., agtawen iti tallopulo, inluganna ni Charlito Tonizol Espiritu, agtawen iti tallopulo ket uppat, agpada a taga-Barangay Banguian, Abulog, Cagayan.
Agpapa-abagatan dagiti dua a lugan ket idi madanonda ti nakapasamakn ti aksidente, nagsikko iti kannigid ti kurong-kurong isu a nadungpar daytoy ti nag-overtake a kotse.
Nadunor dagiti naglugan iti kurong-kurong idinto a saan a naan-ano dagiti naglugan iti kotse.
