Natay ti maysa a dati nga Overseas Filipino worker a nagmaneho iti motorsiklo ta nadungparna iti nakatraysikel idiay Pangada, Sta. Catalina, Ilocos Sur idi kalman, January 7, 2025.
Nabigbig ti nagmaneho iti Yamaha Aerox 155 a dati nga OFW a taga-Caboloan, Sta. Catalina idinto a ti nagmaneho ti Honda TMX wenno traysikel ket ni Rowel Rasonable Obrero, agtawen iti limapulo a taga-Pangada, Sta. Catalina.
Iti pannaki-uman ti Bombo Radyo Vigan ken ni PCpt. Marlon Martinez manipod Sta. Catalina Municipal Police Station, agturong ti daya a direksyon ti nakatraysikel idinto nga agpalaud ti nakamotorsiklo idin kellaat a nagsikko ti nakatraysikel a gappuanan ti pannakadungpar iti nakamotorsiklo.
Segun ken ni Martinez, iti imbestigasyon ket saan a nagsignal nga agsikko ti nakatraysikel a puon iti aksidente.
Kinunana nga uray pay nakahelmet iti nagmaneho iti motorisklo ket nagsagaba iti dunor iti ulo gapu iti kapigsa ti impact iti aksidente.
Naipan pay laeng iti Ilocos Sur Provincial Hospital –Gabriela Silang ti nagmaneho iti motorsiklo para iti pannakatamingna ngem idi maiyakar koman iti ospital ket saannan a nalasat pay.
Naamoan nga awan iti naka-inom iti arak idi napasamak iti aksidente.
Reckless Imprudence Resulting in Homicide and Damage to Property iti sangwen ti nagmaneho iti traysikel ta desidido ti pamilia ti nagmaneho iti motorsiklo nga ituloy iti kaso.
