Bambantayanen ti Independent Commission for Infrastructure (ICI) ti air assets ken water assets dagiti umili ken corporation gapu iti mapapati a pannakairamanda iti korapsyon.
140 nga umili iti maim-imbestigaran karamanen iti agingga 300 a korporasyon.
Inlawlawag ni ICI Technical Working Group Chairman Usec. Aboy Paraiso, saan pay a naka-freeze dagiti nasao nga asset ta madukduktalan pay laeng no siasino iti pudno nga akin-kukua dayta.
Sumagmamano ket nakaiagan wenno nailimed iti salinong ti maysa a nasikat a petroleum company.
No matunton iti pudno nga akin-kukua ken maammoan no naka-rehistro kadakuada dagiti nasao nga asset, insigida nga agipila ti komisyon ti aplikasyon para iti freeze order kontra kadakuada tapno saanen a maaramat wenno mailako pay.
Impaganetget ni Paraiso a kayat ti ICI a malapdan ti pannakagun-od ken pannakailako dagiti asset a posible a nagatang babaen ti pondo a natakaw manipod iti pondo dagiti umili kas ti flood control funds tapno maisubli manen iti gobierno.
Kinuna pay ni Paraiso a ti pannaka-freeze iti binilion a pisos a gatad ti sanikua ni dati a Rep. Zaldy Co ken dadduma pay a personalidad ket paset laeng iti inisyal a pangabak iti gobierno, ken pannakababawi dagiti natakaw a baknang ket maysa kadagiti kangrunaan a gagem iti nabukel nga independent commission.
