Impasigurado ni Presidente Ferdinand Marcos Jr. ti natibker ken agtultuloy a reporma a mangpasayaat ti biag iti tunggal Pilipino, mapapigsa ti ekonomiya ken masigurado nga awan ti komunidad a mabati iti panagdur-as, kangrunaan iti Bangsamoro Autonomous Region in Muslim Mindanao (BARMM).
Iti panangirusat ti Bawat Bayan Makikinabang at National Government–Bangsamoro Government Convergence Program idiay Camp Siongco, Awang, Datu Odin Sinsuat, Maguindanao del Norte, inallukoy ti presidente dagiti Pilipino nga agbalin nga aktibo kadua ti gobierno iti panangitandudo ti salun-at, pagbiagan ken agtultuloy a panagdur-as ti komunidad.
Tampok iti programa ti panangirusat ti National Government–Bangsamoro Government Convergence Program.
Naisayangkat pay ti symbolic turnover ti nasurok-kumurang P3.4 bilyon a gatad ti proyekto ken tulong a mangpapigsa ti relasion ti national government ken ti Bangsamoro government.
Dimmar-ay iti programa dagiti opisyal ti BARMM, kadua da Chief Minister Abdulraof Macacua, Bangsamoro Transition Authority Speaker Mohammad Yacob, miyembro ng Parliament, BARMM Ministry of the Interior and Local Government Minister Jordan Bayam, ken dagiti mayor.
