VIGAN CITY – Saan a mailadawan ni Villanueva Molina nga agtawen ti innem a pulo ket dua a taga- Sarsaracat, Magsingal iti napalaus a ragsak na iti panagturpos na ti Alternative Learning System ti Department of Education idi August 20.
Naallukoy ni Molina nga agbasa gapu iti kumadre na ken ti mangisursuro kadakuada a naanus ken nagaget.
Kinunana, arapaap na iti makaturpos iti panagadal ta patien na a ti adal ket isu iti kangrunaan a gameng a saan to pulos a matakaw wennu maala iti siasinuman.
Nu pay kasta, gapu ta baketen ket saanen nga ituloy ni Molina iti agadal iti kolehiyo.
Maysa ti nasao a senior citizen kadagiti uppat a gasut uppat a pulo ket pito a nagturpos ti ALS iti intero a Deped-Ilocos Sur Division idi August 20 idiay Vigan Convention Center.
