VIGAN CITY– Maidalan ti security assessment ni Mayor Glen kenni Sangguniang Bayan Member Blen Guzman tapnu maamuan nu adda iti seryoso a pangta iti biyag da kalpasan iti napasamak nga engkuwentro idiay ili ti Cabugao a nakatayan ti dua a mapapati a miyembro ti gun-for-hire group a ti maysa kadakuada ket adda ti ikot na a ladawan dagiti agkabsat.
Ti pannaki-uman ti Bombo Radyo Vigan ken ni Police Chief Superintendent Romulo Sapitula, regional director ti Police Regional Office 1, manarimaan pay laeng iti imbestigasyon dagiti intelligence officers inaig iti nakita da a ladawan dagiti agkabsat kadagiti dua a napapatay a suspek nu anya ti rason da.
Inpaganetget ni Sapitula a ti pannakapapatay kadagiti dua a mapapati a miyembro ti gun-for-hire group idiay Cabugao idi kalman ket mangipasimudaag a trabtrabahuwen ti PNP dagiti naited kadakuada a responsibilidad, nangruna iti panangparmek kadagiti tattao a mapapati a binayadan dagiti pulitiko a manglikidar kadagiti kalaban da ti pulitika gapu ti umadanin nga eleksyon.
Namnamaen ti regional director ti PRO1 nga inton Domingo, ti kaaldawan ti panagpirma ti peace covenant ken unity walk ket makipaset dagiti amin a lumaban a pulitiko inton May 2019 midterm elections tapnu maipakita iti sinseridad da iti natalinaay a panagpipili.
