VIGAN CITY – Inbilinen ni National Disaster Risk Reduction and Management Council (NDRRMC) chairperson- Defense secretary Delfin Lorenzana kadagiti pulis idiay Mindanao nga ipan da kadagiti asideg evacuation center dagiti agindeg nga aggigiyan kadagiti igid iti kalsada, nangruna dagiti adda idiay Makilala, North Cotabato a naka-iggem ti placard nga agpatpatulong kadagiti tattao kalpasan iti nagsasaruno a gingined iti nasao a rehiyon.
Ti pannaki-uman ti Bombo Radyo Vigan ken ni NDRRMC – Office of the Civil Defense spokesman Mark Timbal, nadakamat na nga adu ken makanay dagiti relief support a maiteted kadagiti naapektaran ti gigined idiay Mindanao isu a masdaaw da nu apay nga adda dagiti internally displaced persons nga arigna agpalpalaman kadagiti igid iti kalsada.
Kinunana, ti relief distribution ket maisaysayangkat kadagiti evacuation center ken kadagiti barangay isu a masapul a mapan kadagiti evacuation center dagiti IDP tapnu matulungan ida iti gobiyerno.
Atapen da a dagiti umili nga agtaltalinaed kadagiti igid iti kalsada ket saan a mapnek iti tulong a naited kadakuada ken saan da a kayat iti mapan kadagiti evacuation center isu nga agdawat da kadagiti sabali a tao.
Kabayatanna, nadakamat pay ti opisyal a makaawat to ti pinansiyal a tulong dagiti nadunor ken natay a biktima ti gingined idiay Mindanao ngem saan da pay laeng nga ammo nu kaanu a maited.
