Natay ti agina gapu iti panagdinnungpar ti motorsiklo ken kotse idiay Barangay Pug-os, Cabugao, Ilocos Sur.
Ti motorsiklo ket minaneho ti agtawen iti duapulo ket tallo a babai, kinalubbonna ti inana nga agtawen iti uppat a pulo ket innem, agpada a taga-Barangay Teppeng, Sinait.
Ti met kotse ket minaneho ti agtawen iti tallopulo ket lima, taga-Barangay Baclig, Cabugao.
Iti pannaki-uman ti Bombo Radyo Vigan ken ni Police Major Juan Jhay-r Maggay. agpapa-amianan ti motorsiklo idin ta mapapati nga immagaw daytoy iti linya ti kotse isu a napasamak ti panagdinnungpar.
Nagsagaba iti dunor iti ulo ken nadumaduma a paset ti bagina ti drayber idinto a nadunor met ti ulo ti inana.
Naipaagasda iti ospital ngem dead on arrival ti ina idinto a natay bayat ti pannakatamingna ti anak.
Awan met ti nakainom kadagiti drayber idi mapasamak ti aksidente.
Kabayatanna, segun met iti asawa ken ama dagiti agina, kasla saanna pay laeng a patien nga isuda ti immagaw iti linya ta ammona a natanang met nga agmaneho ti putotna ngem namnamaenna a maammuanna ti kinapudno babaen iti CCTV footage.
Kabayatanna, inladawanna met dagiti biktima a nasayaat kenkuana ket kas maysa a pamilia ket ammoda ti agdidinnanggay.
