VIGAN CITY – Walo ribo innem a gasut a piraso ti mula a marijuana nga aggatad ti maysa a milyon pito gasut ket dua pulo ribo a pisos; uppat a pulo a kilo ti napagango a poon ti marijuana a mapatta-patta nga aggatad ti lima a milyon a pisos iti pinarot ken dinadael dagiti kameng ti Sugpon Municipal Police Station, Ilocos Sur Provincial Intelligence Branch , Ilocos Sur Provincial Drugs Enforcement Unit, 2nd Ilocos Sur Provincial Maneuver Force Company ken Philippine Drug Enforcement Agency – Region 1 a nangiwayat iti marijuana eradication idiay Sitio Palali, Barangay Licungan, Sugpon idi kalman.
Ti nasao nga operasyon ket nakemmeg ti cultivator dagiti nasao a marijuana a ni Bennipher Licudan aliyas Kuwaing nga agtawen ti dua pulo ket dua, baro nga agnaed idiay Sitio Lanipew, Barangay Tacadang, Kibungan, Benguet.
Ti agdama, ni Licudan ket ikoten ti PDEA- Region 1.
Kabayatanna, ti sabali a grupo dagiti kameng ti linteg ket inbanag da iti search warrant kontra ken ni Sanny Taypew nga agnaed idiay Sitio Palali, Barangay Licungan, Sugpon inaig iti panaglabsing ti Republic Act 10591.
Naala iti uneg iti pagtaengan na ti maysa a rifle caliber 30 carbine; maysa a rifle a saan nga ammo ti kalibre na; caliber 22 RP, maysa pay a paltog a saan nga ammo ti kalibre na, maysa a caliber 22 nga awan markings na; maysa a caliber 38 revolver nga adda Smith and Wesson seal na; innem a kadapan ti detonating cord, uppat a piraso ti blasting caps, uppat nga stick ti dinamita, maysa a bundle iti napagango a poon iti marijuana a mapatta-patta nga aggatad ti maysa a milyon dua gasut lima pulo ribo a pisos; sumurok- kumurang maysa a kilo ti bukel ti marijuana nga aggatad ti sangapulo ket dua a ribo lima gasut a pisos ken sumurok- kumurang maysa a kilo iti napagango a fruiting tops ti marijuana nga aggatad ti innem a pulo ket dua ribo lima gasut a pisos.
Nu pay kasta, ti suspek a ni Taypew ket saan a nakemmeg dagiti otoridad ngem dagiti naala iti uneg ti pagtaengan na ket ikoten ti Sugpon PNP.
