VIGAN CITY – Napalaus iti panagyaman ni Tuy, Batangas Mayor Randy Afable kadagiti volunteers ken dagiti donors dagiti iteted da a relief items ken sleeping kits kadagiti bakwit a naggapu kadagiti naduma-duma a lugar idiay Batangas a nakaro a naapektaran iti ash fall iti phreatic eruption ti Taal Volcano idi January 12 a nagkamang kadakuada.
Ti pannaki-uman ti Bombo Radyo Vigan ken ni Afable, umaboten ti dua ribo lima gasut ket pito pulo a tattao iti nagkamang kadagiti sangapulo ket dua nga evacuation area iti lugar da nga isu iti tultulungan da iti agdama.
Inkari na a tulungan ken taripatoen da a nasayaat dagiti bakwit a nagkamang kadakuada agingga a mabalin danton iti agsubli kadagiti pagtaengan da.
Kaaduan kadagiti bakwit nga adda itatta idiay Tuy, Batangas ket naggapu idiay Talisay City, Lemery, Agoncillo ken Taal a nakaro a naapektaran iti aktibidad ti Bulkang Taal.
