Kinumpirmaran ti Armed Forces of the Philippines (AFP) a bimmaba ti bilang dagiti barko ti Chinese Coast Guard (CCG) a mabanbantayan iti West Philippine Sea (WPS).
Segun ken ni Philippine Navy Spokesperson for the West Philippine Sea Rear Admiral Roy Vincent Trinidad, na-monitor-da ti siam a barko ti CCG iti lugar ti Bajo de Masinloc, natakuatan met ti maysa a People’s Liberation Army Navy Ship iti paset ti Pag-Asa Island, idinto a dua a barko ti CCG ti natakuatan iti Ayungin Shoal.
Inlawlawag ni Trinidad a posible a gapu iti saan a nasayaat a paniempo nga impaay ni Super Typhoon Nando ti rason ti panagbaba ti bilang dagiti naimatangan a barko ti China idiay WPS.
Agtultuloy met ti panangmonitor ken panangisayangkat ti AFP iti maritime awareness patrols tapno agtultuloy a masalakniban ti sovereignty ken karbengan ti pagilian kadagiti exclusive economic zone (EEZ). – Augie Arellano
