
Pinagkedkedan ken naan-anay a linaksid ti komunidad ti Aeta Magbukon iti Bataan dagiti aktibidad ti panagmina ken panagsukisok iti Mt. Pantingan, kalpasan ti pakaseknan maipapan iti proseso ti Free, Prior and Informed Consent (FPIC).
Gapu iti daytoy, imbilin ti Mines and Geosciences Bureau (MGB) Central Luzon idi Nobiembre 9 ti temporario a pannaka suspende dagiti aktibidad ti panagsukisok ti Balanga Bataan Minerals Corp. babaen ti Mineral Production Sharing Agreement No. 154-2000-III.
Agtalinaed ti suspension agingga a makapasa ti kompania iti kasapulan a sertipikasion.
Kabayatanna, 198 a pannakabagi ti Aeta Magbukon manipud Limay, Bagac, Mariveles ken Orion ti naguummong idiay Limay, Bataan tapno mangipila iti resolusion a mangiyebkas iti panagkedked da iti panagminas iti daga ti kapuonan da.










