Imbingay ni Presidente Ferdinand Marcos Jr. a masapul a maisagana dagiti krisis babaen kadagiti natibker a linteg, institusion, badyet, supply chains ken panagtitinnulong dagiti pagilian.
Segun kenni Presidente Marcos, ti pannakalpas ti negosasion iti ASEAN Digital Economy Framework Agreement (DEFA) ket napateg nga addang nga agturong iti ad-adda a naikaykaysa a digital economy iti rehion.
Impaganetget ti Presidente a masapul a masigurado ti dakdakkel a pannakipaset dagiti negosio, nangruna dagiti micro, small and medium enterprises (MSMEs), iti digital trade ken nalaklaka ken nataltalged ti transaksion iti nagbaetan dagiti pagilian.
Indagadagna pay ti panagtitinnulong ti gobierno, lehislatura, lokal a gobierno, pribado a sektor ken ti publiko tapno matungpal dagiti panagbalbaliw ti teknolohia ken maragpat dagiti panggep ti ASEAN.
