Nadunor ti maysa a drayber ti motorsiklo gapu iti napasamak nga aksidente iti national highway ti Barangay Suso, Sta. Maria, Ilocos Sur.
Karaman iti aksidente ti maysa a motorsiklo nga adda sidecar-na a minaneho ti maysa a lalaki nga agtawen iti duapulo ket siam, goto vendor, agnaed iti Binmaley, Pangasinan, kadua ti live-in partner-na nga agtawen iti uppat a pulo ket lima, maysa a PWD, agnaed iti Barangay Isla, San Carlos City, Pangasinan.
Kabayatanna, ti drayber ti motorsiklo ket agtawen iti duapulo ket siam, agnaed iti Barangay Tangaoan, Sta. Maria.
Agpapa-amianan ti motorsiklo a mangsarsaruno iti traysikel ket idi nadanonda ti nakapasamakan ti aksidente, nag-overtake ti motorsiklo iti igid ti kalsada ken nasagidna ti gas tank a nakaikabit iti likudan a paset ti sidecar ti traysikel, nga isu ti maar-aramat a mobile cooking station para iti panagilako ti drayber iti goto.
Gapu dayta, nadunor ti nadumaduma a paset ti bagi ti drayber ti motorsiklo a naipaagas iti ospital para iti naan-anay a pannakatamingna.
Saan met a naan-ano ti drayber ken ti asawa ti motorsiklo nga adda sidecar-na.
