Maysa a 50-anyos a pasahero ti natiliw iti Ninoy Aquino International Airport (NAIA) Terminal 1 idi Martes, Nobiembre 10, kalpasan ti mapapati a panagang-angawna maipapan iti bomba.
Segun iti PNP Aviation Security Group, agturturong ti pasahero iti Hong Kong idi maipagarup a kinunana, “Bomba, adda bomba,” idinto nga inlawlawag ti maysa nga airline personnel dagiti restriksion kadagiti napeggad a tagilako ken electronic devices.
Dagus a nangiwayat dagiti otoridad iti imbestigasion ti Explosive Ordnance Disposal (EOD) team. Nupay awan ti nasarakan nga bomba iti baggahe na, natiliw latta ken naipan iti NAIA Police Station 1.
Isagsaganan dagiti otoridad ti kaso kontra iti pasahero gapu iti mapapati a panaglabsing na iti Presidential Decree No. 1727 wenno Anti-Bomb Joke Law.
