Itandudo ti Philippine Fisheries Development Authority (PFDA) ti modernisasion dagiti fish ports ken fish markets iti nadumaduma a rehion tapno mapasayaat ti pannakataming ken panagurnong kadagiti produkto ti seafood ken mapaadu ti oportunidad dagiti mangala iti merkado.
Karaman kadagiti proyekto ti moderno a fish port iti Camiguin, fish market iti Pampanga nga addaan iti 20-metric-ton ice plant, ken pannakapalawa ti Camaligan Fish Port iti Camarines Sur.
Segun ken ni PFDA General Manager Atty. Glen A. Pangapalan, panggep dagiti proyekto a mapatalged ti supply chain, malapdan ti pannakadadael ken pannakapukaw dagiti produkto ti panagkalap, ken mapapartak ti pannakaiwarasda iti merkado.
Kabayatanna, imbilin ni Agriculture Secretary Francisco P. Tiu Laurel Jr. ti naing-inget a koordinasion dagiti ahensia tapno maliklikan ti pannakaitantan dagiti proyekto, agraman ti singasing a maaddaan kadagiti pasilidad ti PFDA iti maymaysa a maris tapno nalaka a mailasin ti publiko.
