Silulukat ti Department of Agriculture (DA) iti posibilidad a pannakayatiddug ti 60-day suspension iti panagangkat iti karne ti baboy tapno masalakniban ti lokal nga industria ken matulongan dagiti agtartaraken iti baboy a makasubbot kadagiti lugida.
Maitunos daytoy iti direktiba ti Presidente a mangpapartak iti proseso ti provisional safeguard measures para kadagiti imported a baboy.
Inlawlawag ti DA a ti panggep ti tignay ket saan a tapno maiserra ti merkado, no di ket tapno maikkan dagiti lokal a producers iti patas a gundaway a makabangon ken makaganansia.
Agtultuloy ti panangmonitor ti DA iti Bureau of Customs ken DILG iti nasao a kasasaad ken saanda nga ilaksid ti posibilidad a mayatiddug ti suspension no kasapulan tapno agtalinaed a makaganansia ti lokal nga industria ti karne ti baboy.
