Kinuestionaran ni Manila Representative Joel Chua ti palawag ni Suzette Balucanag-Punay, in-house counsel ti GenCorp Industries Inc. ken Metro Chow Foods Corp., gapu iti mapapati a saan a panagtutunos dagiti testimoniana iti Senate impeachment trial.
Segun ken ni Chua, ti panangilawlawag ti saksi mainaig iti makunkuna a lost investment ken monthly return on capital a maipagarup a naited ken ni Bise Presidente Sara Duterte ti nangpataud iti kanayonan a saludsod.
Impaganetget ni Chua nga awan ti nairekord a kontribusion iti panagpuonan manipud iti bise presidente, isu a para kenkuana, mabalin a maibilang daytoy a pasuksok.
Innayon ni Chua nga adda business transactions ti GenCorp iti Davao, isu a napateg a malawlawagan ti relasion ti kompania ken dagiti transaksion a mainaig iti bise presidente.
Segun ken ni Chua, imbes a sungbatanna ti presentasion ti prosekusion, ti testimonia ti saksi ti nangpaadu laeng kadagiti saludsod.
