Manamnama nga umadu ti produksion ti gatas ditoy pagilian iti 48,000 metric tons inton 2027 manipud iti 46,000 metric tons ita a tawen, segun iti forecast ti United States Department of Agriculture (USDA), iti laksid ti pangta ti El Niño.
Mainaig daytoy iti pannakapalawa dagiti programa ti nutrision a pinunduan ti gobierno, iyaadu dagiti taraken nga animal a mangipapaay iti gatas ken umad-adu a panagkasapulan dagiti agkonsumo ken kapeteria.
Maibasar iti datos manipud iti National Dairy Authority, immadu iti 6.55 a porsiento ti imbentaryo dagiti dairy animals ditoy pagilian, a dimmanon iti 165,858 manipud Enero agingga iti Hunio ita a tawen. Agtultuloy ti panangparang-ay ti gobierno iti lokal nga industria ti gatas babaen kadagiti nadumaduma a programa, agraman ti naiplano a panagangkat iti 1,600 a baka a Holstein-Jersey tapno mapaadu ti suplay ken mapapigsa ti panagbiag dagiti lokal a mannalon.
