Impasigurado ni Palace Press Officer Claire Castro a kayat ni Presidente Ferdinand R. Marcos Jr. a madanon ti tunggal barangay dagiti serbisio ken gundaway ti gobierno, pakairamanan ti edukasion, imprastruktura, trabaho ken pagbiagan.
Segun ken ni Castro, daytoy ti nalawag a mensahe ti Presidente iti National Task Force to End Local Communist Armed Conflict (NTF-ELCAC) a naituding a mangangay iti maika-10 nga Executive Meeting-na sadiay Malacañang, nga idauluan a mismo ti Presidente kaduana dagiti kameng ti Gabinete ken dagiti opisial ti ahensia.
Iti agdama, 5,638 a barangay ti nakaawat iti dagup a P44.90-B a gatad dagiti proyekto ti gobierno, pakairamanan ti 978 classrooms, 1,601 kilometro a farm-to-market roads, 1,182 water and sanitation systems ken 556 health stations.
Mapattapatta a 16.8 a milion a Pilipino ti nagunggonaan kadagitoy a proyekto a panggepda a pasayaaten ti pannakagun-od dagiti komunidad kadagiti kangrunaan a serbisio ken gundaway.
Kanayunanna, umabot iti 33,381 a barangay iti 62 a probinsia ken 9 a rehion iti pagilian ti addaan itan iti stable internal peace and security status.
Innayon pay ni Castro a paset daytoy ti agtultuloy a panagregget ti gobierno a mangpalawa ti kappia ken seguridad kadagiti komunidad tapno masigurado ti pannakaipaay dagiti serbisio, proyekto ken gundaway kadagiti umili.
