Madama ti forensic examination kadagiti dapo nga insuko dagiti pet owner’s iti pulis tapno maammuan no pudno a naggapu dagitoy kadagiti tarakenda nga aso ken pusa a naitalek iti pet crematorium idiay Bacoor City, Cavite.
Segun kenni PNP Spokesperson Colonel Allen Rae Co, naipatuloden dagiti dapo iti forensic group ti Cavite para iti panag-analisa, idinto a posible nga estafa ti pagbatayan ti kaso a maipila kontra iti akinkukua iti nasao a pasilidad.
Agtultuloy met nga imbestigaran dagiti otoridad no mabalin a maipila ti dadduma pay a panaglabsing, bayat nga ikkanda ti akinkukua iti crematorium iti gundaway a mangidatag iti dasig na.
Malagip a naduktalan dagiti bangkay dagiti aso ken pusa iti bakante a lote idiay San Jose del Monte City, Bulacan, a mapapati a naibelleng imbes a maipasidong iti cremation service.
