Imbilin ti Kamara dagiti ahensia ti gobierno a siguradoen da a maiwaras a nasayaat ken dagus ti P6.2 billion a tulong para kadagiti mannalon ken mangngalap a naapektaran iti El Niño ken nakaro a tikag.
Mapattapatta a nasurok 310,000 a babassit a mannalon ken mangngalap ti manamnama a mabenepisyaran iti nasao a tulong a pakairamanan ti subsidy iti gasolina, abono ken dadduma pay a pagbiagan.
Sukimaten pay ti House Committee on Agriculture and Food ti P371 million a kurang ti pondo para kadagiti programa kas iti cloud seeding ken pest control kadagiti plantasyon.
Impaganetget dagiti mammanday-linteg ti kasapulan a mapapartak ti pannaka iwaras ti tulong ken mapapigsa ti panagsagana para iti epekto ti El Niño tapno masalakniban ti panagbiag dagiti mannalon ken mangngalap ken masigurado ti seguridad ti taraon ti pagilian.
