Ibilang ti Ilocos Sur Police Provincial Office a generally peaceful ti selebrasion ti Undas iti intero a probinsia.
Iti pannakiuman ti Bombo Radyo Vigan ken ni Provincial Director Police Colonel Agosto Asuncion, umabot iti nasurok-kumurang 4, 000 a personnel ti naideploy iti nadumaduma a sementeryo iti probinsia tapno masigurado ti seguridad, kina-urnos ken kinatalged ti publiko.
Kadua ti Philippine National Police iti panangtaginayon ti seguridad ti Armed Forces of the Philippines, Philippine Coast Guard, Bureau of Fire Protection, lokal a gobierno, dagiti barangay tanod, MDRRMO, health units, traffic enforcers ken dadduma pay nga organisasion.
Binigbig ni Asuncion dagiti amin nga ahensia a nagtitinnulong a nangipaay ti suporta tapno agbalin a naannayas ken natalna iti selebrasion ti Undas ita a tawen.
Kabayatanna, nagyaman ti opisial iti publiko, kangrunaan kadagiti bimmisita kadagiti sementeryo gapu iti panangsurot-da kadagiti pagannurotan nga inyetnag dagiti otoridad.
