Pagtigtignayen ti Department of the Interior and Local Government (DILG) dagiti lokal a gobierno ken barangay iti intero a pagilian tapno masigurado ti seguridad ken kinaurnos iti pananglagip ti Undas ita a Nobiembre 1 ken 2.
Babaen iti memorandum circular, nabilin dagiti LGU nga agtaripnong ti Local Peace and Order Councils tapno saganaan ti seguridad, crowd control, ken traffic management, kadua dagiti barangay tanod, medical personnel ken traffic enforcers.
Segun iti DILG, umabot iti 282,989 a barangay tanod manipud iti 42,010 a barangay ti nakasagana a mai-deploy kas force multipliers, katinnulongda ti nasurok 111,000 a pulis nga agpatrolya kadagiti lugar a manamnama a darupen ti publiko.
Kabayatanna, mangisaysayangkat iti bukodda a panagsagana dagiti sumagmamano nga LGU, agraman ti Baguio City, Sagada, Mandaue City ken Malolos City tapno masigurado ti kinatalged dagiti agindeg ken biahero ita nga Undas.
