Mabalin nga ibabawi ti Land Transportation Office (LTO) ti lisensia dagiti motorista a mapaneknekan nga agmanmaneho a nakainom wenno nakadroga, kas maisurot iti maipatpatungpal a linteg ken husto a proseso.
Iti salinong ti Memorandum No. MVL-2026-242, binilin ni LTO Chief Assistant Secretary Markus Lacanilao dagiti deputized law enforcement officer a suroten ti naituding a wagas iti pannakakemmeg kadagiti mapagatapan a nabartek a drayber.
Kasapulan pay dagitoy a dumalan iti Field Sobriety Test ket no bumagsakda, ket sa laeng maisayangkat ti testing babaen iti maaramat nga awtorisado nga Alcohol Breath Analyzer.
Nabilin pay ti Law Enforcement Service nga ipasa iti Intelligence and Investigation Division dagiti rekord dagiti natiliwan a motorista, agraman dagiti agkedked a dumalan iti testing para iti naan-anay nga imbestigasion.
Pinalagipan ti LTO dagiti motorista a saan nga agmaneho no nakainom wenno nagaramat iti droga tapno maliklikan ti aksidente ken mapagtalinaed ti kinatalged dagiti amin nga agar-aramat iti kalsada.
