Kinarit ni dati nga Ilocos Sur Governor Luis “Chavit” Singson tiOffice of the Ombudsman, dagiti senador ken kongresista nga imbestigaran dagiti flood control project idiay Ilocos Norte, a maibilang a Baluarte ni Presidente Ferdinand “Bongbong” Marcos Jr.
Kagiddan dayta ti panangipakita ni Singson kadagiti mapapati nga ebidensia mainaig iti mapapati a flood control project iti nasao a probinsia.
Iti pannaki-uman ti Bombo Radyo Vigan ken ni Singson, manipud iti mapatta-patta a 5,500 a flood control project, sangapulo laeng ti narugian, ngem saan pay a naileppas, idinto a ti nabatbatin ket agpapadan a ghost project.
Innayonna pay a palpak ken substandard dagiti nasao a proyekto.
Maipalagip nga immunan a nagpanawagan ti presidente kadagiti agtaktakaw iti pondo ti pagilian a mabainda iti ar-aramidenda.
Ngem nupay kasta, impaganetget ni Singson a ti Presidente mismo ti nasken a mabain gapu kadagiti mapapati nga iregularidad dagitoy a proyekto.
