Makikaysa ti Tagudin Bureau of Jail Management and Penology iti panangrambak iti National Correctional Consciousness Week.
Iti pannaki-uman ti Bombo Radyo Vigan ken ni Jail Inspector Rafael Ornido Jr., paset iti selebrasion ti panangisayangkatda ti nadumaduma a correctional activities, kas ti pannakaisuro maipanggep iti rehabilitasion ken panangsurot iti linteg.
Maipaay pay ti serbisio medical kadagiti Persons Deprived of Liberty wenno PDL.
Gagem dagiti aktibidad a matulongan dagiti PDL iti rehabilitasionda ken maikkan ida ti gundaway nga agbaliw ken agsagana para iti nasaysayaat a masakbayan no bilang makasublidanton iti komunidad.
Kabayatanna, inlawlawag met ni Municipal Jail Warden Janice Bangcado nga awan ti pondo a naggapu iti national government para iti nasao nga aktibidad.
Segun ken ni Bangcado, makibimbinnuligda kadagiti non-government organization ken iti Local Government Unit tapno maipaay dagiti naan-anay a kasapulan dagiti PDL iti edukasion, psychological ken iti pagbiaganda.
