Nangiwaras ti Department of Agriculture (DA) babaen ti Bureau of Fisheries and Aquatic Resources (BFAR kadagiti alikamen nga aggatad iti P34.66-M para iti deep-sea seaweed farming idiay Zamboanga Peninsula tapno mapaadu ti produksion ken matgedan dagiti mangngalap.
Impaganetget ni Agriculture Secretary Francisco P. Tiu Laurel Jr. a kasapulan a mapapigsa ti produksion dagiti nalabaga a seaweed a kas iti Kappaphycus tapno magundawayan dagiti komunidad iti igid ti baybay dagiti gundaway iti merkado.
29 a seaweed nursery system ti naiwaras iti Zamboanga del Sur, Zamboanga Sibugay, Zamboanga City ken Zamboanga del Norte manipud Oktubre 13 agingga 22, pakairamanan dagiti semilia ken alikamen a kasapulan para iti panagmula, panagpamaga ken panagempake.
Panggep ti DA-BFAR a paaduen ti produksion ti ruot ti baybay iti dua a porsiento iti kada tawen agingga iti 2026 ken papigsaen ti posision ti Pilipinas iti sangalubongan nga industria, no sadino nga agdama a maikapat daytoy iti produksion.
