Saan a makanay ti pannakaipangato ti 2027 national budget tapno makagiddan iti inflation ken masolusyonan ti agtultuloy a parikut iti kinarigat ken panagbisin ditoy pagilian.
Dayta ti impaganetget ni IBON Foundation Executive Director Sonny Africa kagiddan ti panangdakamatna nga innem a porsiento laeng ti ngimmatwan ti proposed budget ita a tawen manipud idi 2026 national budget, idinto a 2.7 percent ti inflation rate.
Iti pannaki-uman ti Bombo Radyo Vigan ken ni Africa, ipangpangruna ti gobierno ti panagbayad iti utang, isu nga arigna natipid ti pondo a nasken koma a mailatang kadagiti kangrunaan a pagkasapulan dagiti umili.
Innayonna a ti 2027 proposed budget ket saan a mangipakita iti solusyon tapno mataming ti kumarkaro a kinarigat ken panagbisin a mapaspasaran ti pagilian.
Nupay kasta, kinuna ni Africa a nasken a masigurado no kasano a maipaay ti pondo tapno masungbatan dagiti kangrunaan a pagkasapulan ti publiko, nangruna kadagiti sektor a nakaru a maap-apektaran iti panagpangina ti presio ti magatang.
