Sinuspinde ti Office of the Ombudsman ni Department of Information and Communications Technology (DICT) Undersecretary David Almirol Jr. iti innem a bulan gapu iti maipagarup a panagsusupiat ti interes kadagiti kontrata ti gobierno nga aggatad iti P1.55-B.
Nainaig dagiti reklamo iti walo a kontrata para iti e-government services nga inted ti DICT kadagiti kompania nga addaan iti pinansial a singgalut iti Multisys Technologies Corporation, nga impasdek ni Almirol.
Nasarakan pay ti Ombudsman kadagiti rekord a nagtalinaed ni Almirol nga stockholder ti Multisys kalpasan a nadutokan kas DICT undersecretary idi Agosto 2022, sakbay a naan-anay a naikkat iti listaan dagiti stockholder idi Nobiembre iti isu met laeng a tawen.
Pinasingkedan ti Ombudsman nga adda natibker nga ebidensia para iti administrative charges kontra ken ni Almirol ken mabalin a maapektaran ti imbestigasion no agtalinaed iti opisinana bayat ti pannakadengngeg dagiti reklamo.
via Bombo Cyrelle Ann Rosario
