Nagpanawagan iti suporta iti Provincial Government of Ilocos Sur dagiti hog raiser iti ili ti Magsingal gapu iti nababa a presio ti liveweight hogs, nga isu ti mangituntunda iti pannakalugi iti pagsapulanda.
Iti pannaki-uman ti Bombo Radyo Vigan ken ni Barangay Rey Talapian, saan nga umdas nga iti laeng uneg ti ili ti Magsingal a mailako dagiti tarakenda a baboy gapu iti kinaadu ti suplay ti kada ili.
Iti baet ti agtultuloy a gastosda iti panagpakan ken panagtaraken iti baboy, mapilitan dagiti hog raiser nga ilako dagiti tarakenda uray nababa ti presio tapno saan a manayonan ti gastusenda.
Mangnamnama dagiti hog raiser a mangipaay iti tulong ti gobierno probinsia, kangrunaan iti panangsapul iti nayon nga aggatang ken merkado para kadagiti tarakenda.
