Nagpalagip ni Senador Erwin Tulfo kadagiti overseas Filipino worker (OFW) idiay France, Saudi Arabia ken Israel nga agannad iti baet ti riri, panagatake ken pangta iti seguridad kadagiti nadakamat a pagilian.
Inallukoy ni Tulfo dagiti Pilipino idiay France a lumiklik iti nalawa a kilos-protesta dagiti estudyante ken mangmangged, partikular idiay Paris, gapu kadagiti riot ken insidente ti panagtakawan.
Pinaligapan pay ti senador dagiti OFW idiay Saudi Arabia nga agtalinaed a nasipot ken ammoen dagiti damag sakbay a sumrek iti trabaho gapu kadagiti maipadpadamag a panagatake ti Iran ken kaalyado a grupo ti Houthi idi nadakamat a pagilian
Kabayatanna, binagaan ni Tulfo dagiti Pilipino idiay Israel a lumiklik pay laeng a mapan idiay West Bank gapu kadagiti maipadpadamag a panagatake dagiti sumagmamano a naka-maskara nga Israeli settler kontra kadagiti gangannaet.
