Pinabileg ti Philippine National Police ti intelligence monitoring ken pannakibinnuligda iti sa Philippine Drug Enforcement Agency (PDEA) mainaig kadagiti shipment ti iligal a droga a nasalamaan iti Laos ken Thailand a mapapati a maipatulod iti Pilipinas.
Im-imbestigaran dagiti pannakabagi ti linteg nga adda Pilipino a posible a nairaman iti shipment a nasarakan iti maysa a private jet iti Laos.
Segun iti PNP, maadal a nasayaat ti kada pasamak maibasar kadagiti maala nga impormasion ken ebidensia tapno maammuan no kasapulan ti nayon nga addang iti salinong ti paglintegan ti Pilipinas.
Makikamkammayet pay dagiti otoridad kadagiti gangannaet a law enforcement agency tapno labanan ti transnational drug trafficking, idinto a maipaganetget ti kinapateg ti due process ken panangpaneknek kadagiti pammabasul.
