Umaboten iti 64 a tattao ti napapatay iti nakaro nga anti-crime drive dagiti pannakabagi ti linteg idiay Rio de Janeiro, Brazil.
Karaman kadagiti napapatay dagiti uppat a polis kalpasan ti panangkontra kenkuada dagiti sumagmamano a suspek.
Gagem dagiti autoridad a lappedan ti panagwaras ti krimen ti Comando Vermelho (CV) criminal group – kadaanan a criminal organization idiay Brazil.
Dimmanon ti maysa a tawen sakbay a maipatungpal ti nasao nga operasion a pakairamanan ti 2,500 military ken civilian police personnel.
Kabayatanna, nakemmeg met dagiti 81 a tattao ken nagaramatda ti drone tapno kontraen dagiti polis.
Inallukoy ni Rio de Janeiro State Governor Cláudio Castro dagiti umili nga agtalinaedda kadagiti pagtaenganda bayat nga agtultuloy ti panangsukon dagiti autoridad kadagiti kameng ti gang nga aglemlemmeng iti nasao a lugar. – Augie Arellano
