Inaprubaran ti Senado iti maikatlo ken maudi a pannakaibasa babaen iti botos a 13-5-0 ti Senate Bill 2387 a mangituding iti lima a tawen a termino dagiti opisial ti Barangay ken Sangguniang Kabataan.
Gapu iti nadakamat a gakat nga impila ni Senator Francis “Chiz” Escudero, maaddaan ti baro nga electoral cycle ken agresulta daytoy iti panangitantan ti nakatuding a BSKE inton Nobiembre ita a tawen a mapan inton Nobiembre 2028.
Segun ken ni Escudero, gagem ti gakat a maaddaan ti sigurado ken nasayaat a sistema iti lokal a gobierno tapno maliklikan ti doble-doble a panangitantan ti eleksion no maigiddan daytoy iti national election.
Nupay kasta, pinagkedkedan daytoy dagiti sumagmamano a senador a pakairamanan da Senator Tito Sotto ken Senador Joel Villanueva, ket pinasingkedan da a ti panangitantan manen ti BSKE ket posible nga aglabsing iti Saligang Batas ken mangsayang ti dandani P8 bilyon a nairekord a gastos ti Comelec para iti panagsagana iti eleksion ita a tawen.
